Ons het in Desember 2023 op ‘n road trip gegaan, en ek was vreeslik opgewonde en onder die indruk dat Stephan my gaan vra om te trou in die Kruger Wildtuin. Tot my hartseer het dit nie daardie Desember gebeur nie. Ons het al van 2020 af gesê dat ons Sleeping Beauty (‘n bekende berg in Riversdal) gaan uit klim, maar nooit tot op die punt gekom om dit eintlik te doen nie. 4 Jaar later op die 18de Februarie het ons uiteindelik besluit vandag is die dag. Die eerste stukkie het my skoonouers saam gestap en toe na ‘n rukkie besluit hulle kan nie verder saam stap nie, maar ek en Stephan was vasbeslote om die berg uit te klim. Dit was BAIE warm en BAIE vêr en na ons amper besluit het om, om te draai het ons bo uitgekom! En dit was perfek, daar was nie ‘n wolk in die lug nie, die uitsig was iets vanuit ‘n droom. Ons het so bietjie gesit en gesels en toe besluit ons gaan fotos neem en dan weer terugkeer huis toe. Stephan het aangedring dat ons die kamera op timer moet sit om ‘n foto saam te neem, wat vir my vreemd was omdat hy nie ‘n groot foto mens is nie, maar hy sit toe die foon teen ‘n rots neer en die timer gaan af. Toe ek weer sien toe is hy af op sy een knie en vra my om te trou. Dit was die beste dag van my lewe! Alles was net perfek en hy het toe alles op die ou eind op ‘n video gekry. Ons was in die sewende hemel, minwetend dat daar nog vir ons 5 ure voorlê om af te stap van Sleeping Beauty af voor ons die nuus kan breek! Ek kon nie vir ‘n meer perfekte dag, oomblik en man vra nie, dit was so intiem en so spesiaal ek sal daardie oomblik en gevoel vir niks verruil nie.