Die rol van die seremoniemeester

Die seremoniemeester is die man (of vrou) waarop jy die meeste gaan staatmaak op jou troudag! Hy is die kontakpersoon tussen die bruidspaar en die platejoggie, venue, spyseniers, fotograaf en videograaf en help hulle met vrae en versoeke. Wanneer iets verkeerd loop word die seremoniemeester eerste in kennis gestel, waarna hy dan die bruidspaar in kennis stel. Hier is ‘n lys vir die pligte van die seremoniemeester:

Verwelkom gaste by die seremonie.
Maak seker al die gaste ontvang programme.
Laat gaste binne gaan wanneer die bruid oppad is.
Maak seker die musiek is gereed vir die instap van die bruid en haar gevolg.
Maak seker almal ontvang konfetti na die seremonie.
Stel gaste in kennis wanneer hulle moet regstaan met die konfetti.
Verduidelik die verloop van planne en watter foto’s dadelik saam met die bruidspaar geneem moet word voordat hulle vertrek vir hul gesamentlike foto’s.
Roep die name uit van die persone wat vir foto’s gesoek word.
Wys vir gaste waar hulle peuselhappies en die verwelkomingsdrankies kan gaan geniet.
Laat gaste die onthaalsaal binne gaan wanneer dit gereed is.
Help gaste om hulle sitplekke te kry
Doen die verwelkoming en verduidelik vir gaste waar die kroeg, badkamers en geskenktafel is.
Indien kinders in ‘n apparte lokaal moet wees vra dat ouers hulle asb daarheen sal neem.
Doen solank van die bedankings namens die bruidspaar.
Kondig aan wanneer bruidspaar die onthaalsaal binne gaan kom.
Roep die persoon vir die tafelgebed en noem dat die voorgereg bedien gaan word.
Roep die persone vir die instel van die heildronke en maak seker dat al die tafels vonkelwyn het.
Wanneer die hoofgereg gereed is laat die bruidspaar eerste gaan skep en roep dan per tafel wie wanneer kan gaan kos skep.
Kondig elke deel van die aand aan volgens die bruid se versoek en beplanning en maak seker dat al die nodige persone op die regte tyd op die regte plekke is.
Maak seker die gasteboek doen die rondte en dat dit weer terugbesorg word.

Thumbnail foto: @beautphotography